تۆرکمنیستاندا گئرچکلشدیریلن جمهورباشقانلیغی ائرکن سئچیمی
تۆرکمنیستانین یئنی جمهورباشقانی تورک جمهوریتلری ایله مختلیف ساحهلرده، اؤزللیکله انرژی و نقلیات ساحهلرینده امکداشلیغین درینلشدیریلمهسینه اؤنم وئرهجک
۱۲ مارس ۲۰۲۲ده تۆرکمنیستاندا خالق یئنی دؤولت باشقانینی سئچمک اوچون صاندیق باشینا گئتدی. تخمیناً ۶،۲ میلیون جمعیتی اولان تۆرکمنیستاندا ۳ میلیون ۴۶۰ مین ۸۰ سئچیجی وار. ۹ نامیزدین یاریشدیغی جمهورباشقانلیغی ارکن سئچیمینده قاتیلیم نسبتی یوزده ۹۷،۱۷ اولدو. تۆرکمنیستاندا گئچیریلهن سئچیمی مستقیل دؤولتلر بیرلیگی، تورک دؤولتلری تشکیلاتی، شانگهای امکداشلیق تشکیلاتی و ایسلام امکداشلیق تشکیلاتینین گؤزلمچی هئیتلری ایزلهدی. سئچیمدن سونرا گؤزلمچیلر، "جمهورباشقانلیغی سئچیملری اولوسلارآراسی استانداردلارا و یئرلی قانونلارا اویغون گئچیریلدی" دگرلندیرمهسینی وئردی.
تۆرکمنیستان مرکزی سئچیم کمیسیونو سئچیمنین نهایی نتیجهسینی ۱۵ مارس ۲۰۲۲ده آچیقلادی. نامیزدلردن، تۆرکمنیستان کابینه قورولو باشقان یاردیمچیسی سردار بردیمحمدوو، رایلرین یوزده ۷۲،۹۷سینی آلاراق اؤلکهنین یئنی جمهورباشقانی اولدو. سئچیمین نتیجهلرینه گؤره، تۆرکمنیستان دؤولت بدن تربیهسی و ایدمان انستیتوسو مودور یاردیمچیسی خیدیر نوننایئو یوزده ۱۱،۰۹ سسله ایکینجی، مرو والی یاردیمچیسی آغادجان بکمرادوو ایسه یوزده ۷،۲۲ سسله اوچونجو اولدو.
*
تۆرکمنیستاندا جمهورباشقانی سئچیمینده غالیب گلن سردار بردیمحمدوو ۱۹ مارس ۲۰۲۲.جی ایلده آند ایچدی. تۆرکمن زراعت اونیوئرسیتهسی مهندسلیک و تکنولوژی بؤلومونو بیتیرمیش اولان سردار بردیمحمدوو، ۲۰۰۸-۲۰۱۱.جی ایللرده روسیا فدراسیونو خاریجی ایشلر باخانلیغینین دیپلوماسی آکادمیسینده لیسانس اۆستو تحصیلی آلدی. آیریجا ۲۰۱۱-۲۰۱۳.جو ایللر آراسیندا ژنوده آوروپا گوونلیگی قونوسوندا ائگیتیم گؤردو. ۲۰۱۱-۲۰۱۹.جو ایللرده تۆرکمنیستان خاریجی ایشلر باخانلیغیندا چئشیدلی وظیفهلرده چالیشان بردیمحمدوو، ۲۰۱۶-۲۰۱۸-جی ایللرده تۆرکمنیستان مجلیسینده میللت وکیلی اولدو. ۲۰۱۹-۲۰۲۰.جی ایللرده یئرلی حکومتده والی یاردیمچیسی و والیلیک وظیفهلرینده چالیشان سردار بردیمحمدوو داها سونرا تۆرکمنیستانین صنایع و تیکینتی باخانی اولدو. سردار بردیمحمدوو جمهورباشقانی سئچیلمهدن اؤنجه تۆرکمنیستان باخانلار قورولو باشقان یاردیمچیسی وظیفهسینی یئریتدی.
سردار بردیمحمدووون ایچ و دیش سیاستده آتاسی - اسکی جمهورباشقانی قوربانقولو بردیمحمدووون - سیاستینی داوام ائتدیرجگی گؤزلهنیلیر. سون ایللرده سردار بردیمحمدوو آتاسینین یئرینه خاریجده و اؤلکهده گئچیریلهن تدبیرلره، گؤروشلره قاتیلماقدا ایدی.
بو آرادا قوربانقولو بردیمحمدوو حاکمیتدن گئری چکیلمهدی. تۆرکمنیستانی ۱۵ ایل ایداره ائدن آتا بردیمحمدوو، تۆرکمنیستان پارلمانینین اۆست قانادی اولان خالق مصلحتی باشقانی وظیفهسینی داوام ائتدیرهجک.
جمهورباشقانی سردار بردیمحمدوو، خاریجی سیاستده طرفسیزلیک سیاستینی داوام ائتدیرهجک و دقتینی اونا یاخین اولان اؤلکهلرله امکداشلیغی درینلشدیرمهیه یؤنهلدهجک. مستقیل دؤولتلر بیرلیگی، اقتصادی امکداشلیق تشکیلاتی، شانگهای امکداشلیق تشکیلاتی و ایسلام امکداشلیق تشکیلاتینا عضو دؤولتلر تۆرکمنیستانین خاریجی سیاستینده اوستونلوک وئردیگی اؤلکهلردیر.
افغانیستانداکی وضعیت بیرباشا تۆرکمنیستانا تأثیر ائتدیگی اوچون جمهورباشقانی بردیمحمدوو افغانیستان ایله یاخین ایلیشکیلره داوام ائدهجک و افغانیستاندا باریش و ثابیتلیگین قورونماسینا چالیشاجاق. تۆرکمنیستانین یئنی جمهورباشقانی تۆرک جمهوریتلری ایله مختلیف ساحهلرده، اؤزللیکله انرژی و نقلیات ساحهلرینده امکداشلیغین درینلشدیریلمهسینه اؤنم وئرهجک. چونکو تۆرکمنیستانین استراتژیک قونومو بونو طلب ائدیر.
ایلگیلیلی خبرلر
آورآسیا جمهوریتلرینین گۆندمیندهکی گلیشمهلر
۷-۸ می ۲۰۲۴ تاریخلرینده آذربایجان باشباخانی علی اسدوو تۆرکیهیه رسمی سفر گئرچکلشدیردی