روسیا - اوکراینا ساواشینین، مستقیل دؤولتلر بیرلیگی اؤلکهلرینه ائتکیلری
روسیا-اوکراینا ساواشینین گئدیشی و کۆرهسل اویونچولارین ایلیشکیسی بحرانین فورصته چئوریلیب-چئوریلمهمهسینی معین ائدجک
روسیانین اوکراینایا سالدیریسیندان بیر آیدان چوخ واخت گئچیر. هلهلیک ساواشین دوردورولماسی ایله باغلی طرفلر آراسیندا آپاریلان دانیشیقلاردا آنلاشما الده اولونمادی. روسیا-اوکراینا ساواشی بوتون دونیایا منفی تأثیر ائدیر. بونونلا بئله، مستقیل دؤولتلر بیرلیگینه عضو اولان اؤلکهلر سؤزوگئدن ساواشدان داها چوخ تأثیرلهنیر.
مستقیل دؤولتلر بیرلیگینه عضو دؤولتلرین روسیا-اوکراینا ساواشینا یاناشیمی اونلارین کرملین ایله حاضیرکی ایلیشکیلرینه گؤره شکیللهنیر. روسیا ایله بۆتونلشمه پروسهسینه باشلایان بلاروس آچیق شکیلده کرملین سالدیرقان سیاستینی دستکلهییر. آوراسیا اقتصادی بیرلیگینین دیگر دؤولت یؤنتیملرینین روسیانین اوکرایناداکی "حربی عملیاتینا" یعنی سالدیریسینا قارشی آچیق بیر دوروش سرگیلهیهجگینی گؤزلنمهمکدهدیر. بیرلشمیش میللتلر تشکیلاتینین باش قورولونداکی اوکراینا اویلاماسیندا مستقیل دؤولتلر بیرلیگینه عضوو اولان اؤلکهلرین بعضیلری طرفسیز قالیب، بعضیلری ایسه اویلامایا فاتیلمادی. مستقیل دؤولتلر بیرلیگینه عضو دؤولتلر آراسیندا یالنیز اؤزبکیستان اوکراینانین تورپاق بوتؤولوگونو دستکلهدیگینی و قوندارما لوهانسک و دونتسک جمهوریتلرینی تانیمایاجاغینی بیلدیردی.
روسیانین اوکراینایا سالدیریسی باتی اؤلکهلرینین روسیایا قارشی تحریملر تطبیق ائتمهسینه سبب اولدو. بو تحریملر بیر چوخ مسئلهده روسیا ایله امکداشلیق ائدن مستقیل دؤولتلر بیرلیگینه عضو دؤولتلره بیرباشا تأثیر ائدیر. بعضی اؤلکهلرین یوکسک سویهلی بوروکراتلاری بحرانی فورصته چئویرهبیلهجکلرینی و اؤلکهلرینین روسیایا صادراتینین آرتاجاغینی بیلدیریرلر. روسیا-اوکراینا ساواشینین گئدیشی و کۆرهسل اویونچولارین ایلیشکیسی بحرانین فورصته چئوریلیب-چئوریلمهمهسینی معین ائدجک. ساواش نتیجهسینده دونیادا قطبلاشمانین آرتماسی و مستقیل دؤولتلر بیرلیگی اؤلکهلرینین طرف سئچمک مجبوریتینده قالماسی سؤزوگئدن اؤلکهلرین اقتصادی و دیگر شرطلرینه منفی تأثیر گؤسترهبیلر.
ساواش باشلایاندان سونرا روسیا و اوکراینا اؤز ارزاق گوونلیگینی تامین ائتمک اوچون بیر چوخ محصولون خاریجه صادراتینا قاداغا قویودو. بو وضعیت مستقیل دؤولتلر بیرلیگی اؤلکهلرینده ارزاق قیمتلرینین آرتماسینا سبب اولدو. ارزاق گوونلیگی مستقیل دؤولتلر بیرلیگی جغرافیاسیندا اولان اؤلکهلرین آنا گوندم مسئلهسینه چئوریلدی.
ساواشدا اینسان ایتکیسی قاچیلمازدیر. بیر آیدیر داوام ائدن ساواشدا هم اوکراینا، هم ده روسیا اؤز عسگرلرینین ساییسینین میندن چوخ، دوشمنینین ایسه ۱۵ مینه یاخین اولدوغونو بیلدیردی. مستقیل دؤولتلر بیرلیگینه عضوو اولان اؤلکهلردن روسیایا کؤچموش و روسیا وطنداشی اولان عسگرلرین اؤلوم خبرلری مطبوعاتدا چیخیر. ایندیه دک قازاقیستان، قیرقیزیستان و تاجیکیستاندان اولان روس عسگرلرینین اوکراینادا هلاک اؤلمهسی ایله باغلی خبرلر یاییملاندی.
*
بیرلشمیش میللتلر تشکیلاتی ۲۴ فوریهدن بری اوکراینانی ترک ائدنلرین ساییسینین ۳،۸ میلیونا چاتدیغینی آچیقلادی. اؤلکهدهکی ائولرینی ترک ائتمهیه مجبور ائدیلهن اوکراینالیلارین ساییسی ۱۰ میلیونو گئچدی. روسیادان باشقا اؤلکهلره کؤچهنلر ده وار. یازیلیمچیلار باشدا اولماق اۆزره بیر چوخ روسیالی اوزمان، عائلهلری ایله بیرلیکده مستقیل دؤولتلر بیرلیگی اؤلکهلرینه کؤچور. مستقیل دؤولتلر بیرلیگینه عضوو اولان دؤولتلره کؤچموش روسلار یئرلی اقتصادین و دیگر ساحهلرین گلیشیمینه قاتقی وئرهبیلرلر. اما عموماً ساواشین داوام ائتمهسی مستقیل دؤولتلر بیرلیگینه عضو اولان دؤولتلره منفی تأثیرینی داوام ائتدیرهجک.
ایلگیلیلی خبرلر
آورآسیا جمهوریتلرینین گۆندمیندهکی گلیشمهلر
۷-۸ می ۲۰۲۴ تاریخلرینده آذربایجان باشباخانی علی اسدوو تۆرکیهیه رسمی سفر گئرچکلشدیردی