اورتا آسیا اؤلکه‌لرینین عرب اؤلکه‌لری ایله ایلیشکیلری گلیشیر
اورتا آسیا دؤولتلرینین باشقا اؤلکه‌لر و یا اولوسلارآراسی تشکیلاتلارلا ایلیشکیلرینده اورتاق فعالیتی گله‌نک حالینا گتیرمیش اولماسی سئویندیریجیدیر
۷ سپتامبر ۲۰۲۲.جی ایل تاریخینده سعودی عربیستانین باشکندی ریاضدا بیرینجی کؤرفز عرب دؤولتلری امکداشلیق شوراسینا عضو دؤولتلرین و اورتا آسیا اؤلکه‌لرینین خاریجی ایشلر باخانلارینین استراتژیک امکداشلیق توپلانتیسی گئچیریلمیشدیر. ایلک دفعه گئچیریله‌ن بو توپلانتیدا قازاقیستان، قیرقیزیستان، اؤزبکیستان، تاجیکیستان، تورکمنیستان، سعودی عربیستان، قطر، کویت، بیرلشمیش عرب امیرلیکلری، بحرئین و عمانین خاریجی ایشلر باخانلاری ایشتیراک ائتدی. توپلانتیدا آدی گئچن بؤلگه‌لر آراسیندا موختلیف ساحه‌لرده امکداشلیغین گئنیشلندیریلمه‌سی ایمکانلاری موذاکیره اولوندو. آیریجا بؤلگه‌سل گوونلیک و اولوسلارآراسی ساحه‌ده مؤوجود وضعیت ده موذاکیره اولوندو. توپلانتینین سونوندا ۲۰۲۳-۲۰۲۷.جی ایللری احاطه ائد‌ن یاتیریم، تیجارت، نقلیات، تحصیل، بیلیم، ساغلیق، مدنیت و ایدمان ساحه‌لرینده امکداشلیغین یول خریطه‌سینین فعالیت پلانی قبول ائدیلدی.
توپلانتی چرچیوهسینده چوخ ساییدا ایکیلی گؤروشمه گئچیریلدی. بیر سیرا امکداشلیق مموراندوملاری ایمضالاندی. سونراکی توپلانتی گلن ایل اؤزبکیستانین سمرقند شهرینده گئچیریله‌جک. بون‌دان علاوه، ۲۰۲۳.جو ایلین اژوئن آییندا قازاقیستان‌دا بیرینجی کؤرفز عرب دؤولتلری امکداشلیق شوراسی و اورتا آسیا اؤلکه‌لرینین اقتصادی فورومو گئچیریله‌جک.
خاتیرلاداق کی، اؤتن آگوستون اولین‌ده کؤرفز عرب دؤولتلری امکداشلیق شوراسینین باش کاتیبی نایف فلاح الحجرف اورتا آسیا اؤلکه‌لرینه سفر ائتمیش، اؤلکه‌لرین رهبرلری ایله گؤروشمه‌لر گئچیرمیش، امکداشلیق آنلاشمالاری ایمضالامیشدی.
*
اورتا آسیا اؤلکه‌لری ایله کؤرفزده‌کی عرب اؤلکه‌لری آراسیندا ایلیشکی‌لر سون ایللر سرعتله گلیشیر. اورتا آسیا لیدئرلری تئز تئز عرب اؤلکه‌لرینه سفرلر ائدیرلر. قارشیلیقلی اوچوشلار ایکی اوچ قات آرتیریلدی. اؤنجه‌لر عرب اؤلکه‌لری اورتا آسیادا مسجید و ماوخول تیکیمی کیمی خیریه ایشلری ایله تانینیردیسا، ایندی عربلر بؤلگه‌ده بؤیوک یاتیریملاری ایله بیلینیرلر. عرب اؤلکه‌لرینین ایرانلا ایلیشکیلری دۆزلیرسه، اورتا آسیا کؤرفز اؤلکه‌لری ایله یاخینلاشاجاق و قورو نقلیاتی سرعتلنه‌جک.
سون ایللر کؤرفز عرب اؤلکه‌لرینین آسیا قاره‌سینده‌کی دؤولتلرله امکداشلیغین گلیشدیریلمه‌سینه اؤنم وئردیگی گؤرونور. سعودی عربیستان، قطر و بیرلشمیش عرب امیرلیکلری، شانگهای امکداشلیق تشکیلاتینا عضو اولماق ایسته‌ییر. اورتا آسیا اؤلکه‌لری ایله ایسلام امکداشلیق تشکیلاتی چرچیوهسینده ایلیشکی‌لر گلیشدیرمکده‌دیر.
کؤرفزده‌کی عرب اؤلکه‌لری ایله اورتا آسیا اؤلکه‌لری آراسینداکی امکداشلیق ساحه‌لری گئنیشله‌ییر. یئنیلیکچی تکنولوژیلر، درمانچیلیق، حیوانچیلیق و اکینچیلیک کیمی بیر چوخ ساحه‌ده بو بؤلگه‌لرین اؤلکه‌لری امکداشلیقلارینی داها دا اینکیشاف ائتدیره‌بیلرلر.
اورتا آسیا دؤولتلرینین باشقا اؤلکه‌لر و یا اولوسلارآراسی تشکیلاتلارلا ایلیشکیلرینده اورتاق فعالیت گؤسترمه‌گی گله‌نک حالینا گتیرمیش اولماسی سئویندیریجیدیر. بؤلگه‌سل تشکیلاتلارلا امکداشلیغین گئنیشلندیریلمه‌سی اورتا آسیا اؤلکه‌لرینین اؤز آرالاریندا بوتونلشمه‌سینی ده سرعتله‌ندیره‌جک. باتی-روسیا چکیشمه‌سی، اورتا آسیا اؤلکه‌لرینه دیگر بؤلگه‌لر و دؤولتلرله ایلیشکیلرینی ساغلاملاشدیرما ایمکانی وئریر.
ایلگیلی‌لی خبرلر
آورآسیا جمهوریتلرینین گۆندمینده‌کی گلیشمهلر
۷-۸ می ۲۰۲۴ تاریخلرینده آذربایجان باشباخانی علی اسدوو تۆرکیه‌یه رسمی سفر گئرچکلشدیردی
