گونئی قافقازدا گئچه‌ن هفته
ایستر سفرلر، ایستر‌سه پلانلانان ذیروه انرژی قونوسون‌دا گونئی قافقازین دوغو ایله باتی آراسیندا ساغلام کؤرپو اولماغا نامیزد اولدوغونو اورتایا قویور
گئچه‌ن هفته گونئی قافقازدا بیر نئچه اؤنملی گلیشمه بیردن یاشاندی. ایندی بو گلیشمه‌لره سیراسی ایله گؤز آتاق.
گئچه‌ن هفته آذربایجان و تۆرکمنیستان آراسیندا قارشی‌لیق‌لی سفرلر ائدیلدی. ۵ دسامبر ۲۰۲۲ تاریخینده تۆرکمنیستان باشباخان کؤمک‌چی‌سی راشید مردوو باشقانلیغین‌داکی هیئت باکییا گئتدی. آذربایجان جمهورباشقانی ایلهام علییئو تۆرکمن هیئتینی قبول ائتدی. تۆرکمنیستان‌دا ائدیله‌جک آذربایجان-تۆرکیه-تۆرکمنیستان ذیروه‌سی اولین‌ده راشید مردوو آنکارا و باکییا سفرلر تشکیل ائتدی.
آذربایجان مجلیس باشقانی صاحبه غافارووا ایسه ۷ دسامبر ۲۰۲۲ تاریخینده تۆرکمنیستانا رسمی سفر گئرچکلشدیردی. تۆرکمنیستان مجلیسینه خیطاب ائد‌ن غافارووا، تۆرکمنیستان مجلیس باشقانی قوربانقولی بردی‌محمدوو، جمهورباشقانی سردار بردی‌محمدوو ایله آیری-آیری گؤروشدو. ایکی اؤلکه پارلمانلاری آراسیندا امکداشلیق آنلاشمالاری ایمضالاندی. صاحبه غافارووا عشق‌آباد‌دا تشکیل ائدیله‌ن اورتا آسیا دؤولتلری قادینلاری دیالوگو ییغینجاغینا دا قاتیلدی.
۶ دسامبر ۲۰۲۲ تاریخینده آذربایجان جمهورباشقانی ایلهام علییئو، داغیستان جمهورباشقانی سرگئی ملیکووو قبول ائتدی. گؤروشمه‌ده ایکیلی ایلیشکی‌لرین سویه‌سین‌دن دویولان ممنونیت دیله گتیریلدی.
۸ دسامبر ۲۰۲۲ تاریخینده آذربایجان جمهورباشقانی ایلهام علییئو آلبانی باشباخانی ادی راما ایله گؤروشدو. باکی‌دا ائدیله‌ن ایکیلی گؤروشمه‌ده ایکی اؤلکه ایلیشکی‌لرینین گوندمین‌ده اولان مسئله‌لر، جمهورباشقانی علییئوین آلبانییه ائتدیگی سفرین نتیجه‌لری اله آلیندی. ادی راما داها سونرا تۆرکیه‌یه گله‌رک جمهورباشقانی رجب طیب اردوغان ایله گؤروشدو.
گئچه‌ن هفته آذربایجان اوکراینایا ۴۵ ترانسفورماتور و ۵۰ ژنراتوردان عبارت اولان اینسانی کؤمک گؤندردی. آذربایجانین اوکراینایا ساواش باشلادیغی تاریخ‌دن بو یانا گؤندردیگی کؤمیین میقداری ۱۷،۶ میلیون دلارا چاتدی.
***
ارمنیستانین تۆرکیه ایله ایلیشکی‌لرین نورماللاشدیریلماسین‌دان مسئول اؤزل نماینده‌سی روبن روبینیان یاخین زامان‌دا سؤز قونوسو ایکی اؤلکه آراسیندا دوغرودان اوچاق یوک داشیماچیلیغینین باشلایابیله‌جگینی بیلدیردی. روبینیان، مارگارا کؤرپوسونون تعمیرین‌دن سونرا ایکی اؤلکه آراسیندا اوچونجو اؤلکه وطنداشلارینین گئچیشینه ده ایجازه وئریله‌جگینی ایفاده ائتدی. بیر سونراکی مرحله‌ده ایکی اؤلکه آراسیندا بیر باشا تیجارتین ائدیلمه‌سی قونوسو وار.
۵ دسامبر ۲۰۲۲ تاریخینده آذربایجان جمهور باشقانی ایلهام علییئو تۆرکیه ساوونما باخانی حولوصی آخار باشقانلیغین‌داکی تۆرکیه هیئتینی قبول ائتدی. گؤروشمه‌ده ایکی ایلیشکی‌لر، اورتاق عسگری مانور قونوسو اله آلیندی. تۆرکیه و آذربایجان اوردوسو ۵-۶ دسامبر تاریخلرینده آذربایجان‌دا "قارداش یومروغو" عسگری مانورونو تشکیل ائتدی.
تۆرکیه‌نین تۆرک جمهوریتلری ایله گوونلیک امکداش‌لیغی قونوسون‌دا بو گلیشمه‌نی ده ایفاده ائتمه‌دن گئچه‌بیلمریک. ۸ دسامبر ۲۰۲۲ تاریخینده اؤزبکیستان جمهورباشقانی شؤوکت میرضیایئو تۆرکیه ایله ساوونما ساحه‌سین‌ده ایمضالانان امکداشلیق آنلاشماسینی تصدیقله‌دی. سؤز قونوسو آنلاشما ساوونما صنایعی باش‌دا اولماق اوزره بیر چوخ مؤوضوعدا امکداشلیق ایمکانی وئریر.
ایستر سفرلر، ایستر‌سه پلانلانان ذیروه انرژی قونوسون‌دا گونئی قافقازین دوغو ایله باتی آراسیندا ساغلام کؤرپو اولماغا نامیزد اولدوغونو اورتایا قویور. اورتاق عسگری مانورلار بؤلگه‌نین آرتیق گوونلی اولدوغو قونوسون‌دا ضمانت وئریر. ارمنیستان دا بو یئنی فورصتلردن فایدالانابیلمک اوچون تۆرکیه و آذربایجان ایله ایلیشکی‌لرینی سرعت‌لی بیر شکیل‌ده نورماللاشدیرمالی‌دیر.
ایلگیلی‌لی خبرلر
آورآسیا جمهوریتلرینین گۆندمینده‌کی گلیشمهلر
۷-۸ می ۲۰۲۴ تاریخلرینده آذربایجان باشباخانی علی اسدوو تۆرکیه‌یه رسمی سفر گئرچکلشدیردی
