تورک جمهوریتلرینین گوندمیندهکی حادثه‌لر
اؤزبکیستان و قیرقیزیستان مجلیسلری ایکی اؤلکه وطنداشلارینا قارشیلیقلی اولاراق پاسپورت اولمادان، کیملیک سندی ایله گیریش- چیخیش حاقی تانییان آنلاشمانی تصدیقله‌دی
تورک جمهوریتلرینده گئچن هفته میدانا گلن اؤنملی حادثه‌لری دقتلرینیزه سونوروق.
۳۰ آوریل ۲۰۲۳ تاریخینده اؤزبکیستاندا آنایاسا دییشیکلیگی رفراندومو تشکیل ائدیلدی. رفراندوما قاتیلانلارین یوزده ۹۰.۲۱ی آنایاسا دییشیکلیگینی دستکله‌دیلر. یئنی آنایاسایا گؤره جمهورباشقانینین وظیفه مدتی بئش‌دن یئددی ایله چیخاردیلدی و سنا عضو ساییسی یوزدن آلتمیش بئشه ائندیریلدی.
اؤزبکیستان جمهورباشقانی شؤوکت میرضیایئو ۲-۴ می ۲۰۲۳ تاریخلرینده آلمانیا فدرال جمهوریتینه رسمی سفر گئرچکلشدیردی. ۲ می تاریخینده جمهورباشقانی میرضیایئو آلمانیا باشباخانی اولاف شولز ایله گؤروشدو. گؤروشمه‌لر سونوندا ایکی اؤلکه آراسیندا ۱۶ آنلاشما ایمضالاندی. ۳ می تاریخینده میرضیایئو آلمانیا جمهورباشقانی فرانک-والتر اشتاین‌مایر ایله گؤروشدو. سفر چرچیوه‌سینده گئرچکلشدیریلن آلمانیا-اؤزبکیستان ایش فوروموندا ۹ میلیارد دلارلیق ایکی‌لی آنلاشمالار ایمضالاندی.
اؤزبکیستان و قیرقیزیستان مجلیسلری ایکی اؤلکه وطنداشلارینا قارشیلیقلی اولاراق پاسپورت اولمادان، کیملیک سندی ایله گیریش- چیخیش حاقی تانییان آنلاشمانی تصدیقله‌دی. تورکیه و آذربایجان وطنداشلاری بنزر شکیلده پاسپورت‌سوز، کیملیک سندی ایله قارشیلیقلی سیاحت ائده‌بیلیرلر. تورک دؤولتلری تشکیلاتینا عضو دؤولتلر اؤز آرالاریندا وطنداشلارینا کیملیک سندی ایله سربست سیاحت حاقی تانیماسی لازیمدیر.
۴ می ۲۰۲۳ تاریخینده تاجیکیستان جمهورباشقانی امامعلی رحمان قازاقیستانا دؤولت سفری گئرچکلشدیردی. آستانادا قازاقیستان جمهورباشقانی قاسیم جومرت توکایئو تاجیک قونومداشی رحمان ایله هر طرفلی گؤروشمه‌لر ائتدی. ائدیله‌ن گؤروشمه‌لر نتیجه‌سینده طرفلر آراسیندا بیرلیک آنلاشماسی داخیل دوققوز آنلاشما ایمضالاندی. سفر چرچیوه‌سینده گئرچکلشدیریلن قازاق-تاجیک ایش فوروموندا ۱.۸ میلیارد دلارلیق آنلاشمالار ایمضالاندی.
قازاقیستان باشباخانی علیخان سماعیلوو ۵ می ۲۰۲۳ تاریخینده اؤزبکیستانا سفر گئرچکلشدیردی. داشکند‌ده ایکی اؤلکه باشباخانلاری ۲۰.جی قازاخیستان-اؤزبکیستان حوکومتلرآراسی امکداشلیق کومیسیونو ییغینجاغینا باشقانلیق ائتدیلر. علیخان سماعیلوو اؤزبکیستان جمهورباشقانی شؤوکت میرضیایئو طرفیندن قبول ائدیلدی.
ماجاریستان مجلیس باشقانی لازلو کؤور ۴-۷ می ۲۰۲۳ تاریخلرینده موغولستانا رسمی سفر گئرچکلشدیردی. ماجاریستان مجلیس باشقانی موغول قونومداشی زاردانشاتار گومبوژاو و باش باخان اویون-ارده‌نه لووساننامسرای ایله گؤروشدو.
ماجاریستان خاریجی ایشلر و خاریجی تیجارت باخانی پتر سیارتو ۴ می تاریخینده تورکیه‌یه سفر گئرچکلشدیردی. پتر سیارتو بیر ماجار برندی اولان مدیتور مدیکالین آچیلیش مراسیمینده ایشتیراک ائتدی.
۵ می ۲۰۲۳ تاریخینده ایرانین یئنی تعیین ائدیله‌ن مرو باش‌کونسولو عبدالمجید کامجو تورکمنیستان خاریجی ایشلر باخانی کؤمکچیسی بردی‌نیاز میاتیئو ایله گؤروشدو. بئله‌جه ایرانین تورکمنیستانداکی مرو باش کونسوللوغونا ایش حاقی تانیندی.
***
گئچن هفته اولوسلارآراسی فوتبال فدراسیونلاری بیرلیگی فیفا باشقانی جیوانی وینکنزو اینفانتینو اورتا آسیا تورنمنتی چرچیوه‌سینده قازاقیستان، قیرقیزیستان، اؤزبکیستان و تورکمنیستانا سفر ائتدی. فیفا باشقانی سؤزو گئدن اؤلکه‌لرین جمهورباشقانلاری ایله گؤروشدو.
۴ می ۲۰۲۳ تاریخینده ایستانبول آتاتورک کولتور مرکزینده ایستانبول ۲۰۲۳ تورک دونیاسی گنجلیک باشکندی آچیلیش مراسیمی گئرچکلشدیریلدی. آچیلیشا تورک دؤولتلر تشکیلاتینا عضو دؤولتلرین گنجلیک و ایدمان باخانلاری و باخان کؤمکچیلری ایشتیراک ائتدی.
گؤرولدوگو اوزره، گئچن هفته تورک جمهوریتلرینده اؤنملی گلیشمهلر میدانا گلدی.
ایلگیلی‌لی خبرلر
آورآسیا جمهوریتلرینین گۆندمینده‌کی گلیشمهلر
۷-۸ می ۲۰۲۴ تاریخلرینده آذربایجان باشباخانی علی اسدوو تۆرکیه‌یه رسمی سفر گئرچکلشدیردی
