میصرین میدان اوخومالاری
تورکیه سیاست، اقتصادیات و جمعیت آراشدیرمالاری فوندو – ستا-نین آراشدیرماچی-یازاری جان آجونون "میصرین میدان اوخومالاری" باشلیقلی مقالهسی...
تورکیه سیاست، اقتصادیات و جمعیت آراشدیرمالاری فوندو – ستا-نین آراشدیرماچی-یازاری جان آجونون "میصرین میدان اوخومالاری" باشلیقلی مقالهسی...
تورکیه و میصر علاقهلرین یئنیدن ایستراتژی طرفداشلیغا چئوریلدیگی بیر دؤوره قدم قویدو. هر ایکی اؤلکهده موناقیشهدن چوخ عمومی ماراقلاری هدفلهین یئنی ایراده وار. بورادا بولگهسل چاغیریشلار و داخیلی پروبلئملر اساس تشکیل ائتسه ده، خصوصیله میصرین تورکیه ایله موناسیبتلرینی یئنیدن نورمال وضعیته سالماسی اوچون جدی مجبور ائدیجی سببلر وار. میصر موختلیف مؤوضوع لاردا جدی بحرانلا قارشی-قارشییادیر.
میصرده باش وئرن حربی چئوریلیشدن سونرا عبدالفتاح السیسی پرزیدنت اولاراق یئنی رژیم قوردو. اصلینده حاضیردا دا داوام ائدن بو سیستم میصرده اینقیلابدان اوولکی دؤوره قاییدیشی ایفاده ائدیر. بو، حربی نخبه لر و قیسمن ده محکمه بوروکراسیسی کیمی موختلیف بوروکراتیک گوج مرکزلرینین حاکم اولدوغو بیر سیستمدیر. سیاسی سیستم بعضی چتینلیکلره باخمایاراق وارلیغینی داوام ائتدیرسه ده، اصل تیخانمانین اقتصادیاتا سؤیکندیگینی سؤیلمک مومکوندور.
میصر اقتصادیاتی جدی بحران ایچیندهدیر. اؤلکهنین بؤیوک خاریجی تیجارت کسیری اولدوغو حالدا، سیسینین حاکمیتینده 160 میلیارد دولارلیق خاریجی بورج یارانیب. مرکزی بانکین ذخایری خاریجدن گلن سوآپ لار ایله داوام ائتدیریلیر، لاکین خاریجی بورجون مالیهلشدیریلمهسینده جدی چتینلیک وار. میصر اولوسلار آراسی پول صاندیغی ایله سازیش ایمضالاییب و حاضیردا آرژانتین-دن سونرا اولوسلار آراسی پول صاندیغینا ان چوخ بورجو اولان ایکینجی اؤلکهدیر. اولوسلار آراسی پول صاندیغی یئنی کرئدیت اوچون سرت شرطلر ایرهلی سورور.
خصوصیله اوردونون اقتصادیاتداکی هژمونیسینه تدریجن سون قویولماسی، پولون اوجوزلاشماسی، ایستراتژی سئکتورلار دا داخیل اولماقلا اؤزل لشدیرمه طلبلری وار. ایندیکی دوزن بو طلبلری یئرینه یئتیرمهیه او قدر ده هوسلی گؤرونمور. کؤرفز اؤلکهلرینین بورجلاری معین حده چاتیب و یئنی قایناق گیریشی مومکون دئییل. یئنه اؤتن گونلرده سیسینین ده بو یاخینلاردا قئید ائتدیگی کیمی، سوئز کانالیندان الده ائدیلن 10 میلیارد دولارلیق ایللیک گلیرین ان آزی یاریسی حوثی لرین هوجوملاری نتیجهسینده ایتیریلیر. اورتا حسابلا میصرلیلارین آلیجیلیق قابیلیتی گوندن-گونه آزالدیقجا، زامان-زامان ان اساس احتیاجلار اوچون قارا بازار یارانیر. میصرین پول واحیدی ده ایکی آیری قیمته مالیکدیر: رسمی و کوچه بازاری. کوچهده پولون دگری دئمک اولار کی، یاریدان آشاغیدیر.
جدی ژئوپلیتیکی ریسکلر ده وار. سودان-داکی وطنداش محاربهسی میصر اقتصادیاتینا منفی تأثیر گؤستریر. قاچقین آخینی باش وئریر. اتیوپی ایله ایله رنسانس سد بحرانی میصرین سو تجهیزاتی تهلوکهسیزلیگینی تهدید ائدیر. لیبیا-دا سیاسی و حربی پارچالانما میصرین ماراقلارینا خلل گتیریر. اما اصل تهلوکه غزه-دن گلیر. ایسراییلین غزه-ده حیاتا کئچیردیگی غیری-اینسانی قتل عام لارین اساس مقصدی بؤلگهده اهالینی سیخیشدیرماق و غزه-لیلری میصرین سینای یاریماداسینا سورگون ائتمکدیر. بو وضعیت هر معنادا میصرین میللی تهلوکهسیزلیگی اوچون جدی تهدید تشکیل ائدیر.
اونا گؤره ده تورکیه-میصر ایستراتژی طرفداشلیغی هر ایکی اؤلکه اوچون اهمیتلی و دگرلی اولسا دا، میصر اوچون داها واجیب بیر پروسهدیر. میصر هم اقتصادی، هم ده ژئوپلیتیکی تهدیدلره قارشی تورکیه ایله طرفداشلیقدان جدی منفعت الده ائده بیلر.