تۆرک جمهوریتلریندهکی گلیشمهلر
تۆرکیه جمهورباشقانی رجب طیب اردوغانین حمایهلرینده ۳.جو آنتالیا دیپلوماسی فورومو "بحرانلار دؤنمینده دیپلوماسینی اؤنه چیخارماق" باشلیغی آلتیندا باشارییلا گئرچکلشدیریلدی
گئچهن هفته دوغودان باتییا تۆرک جمهوریتلرینده اؤنملی حادثهلر میدانا گلدی. ایندی بونلارا سیراسی ایله باخاجاغیق.
۲۷ فوریه ۲۰۲۴ تاریخینده ماجاریستان میللی مجلیسی اؤلکهنین یئنی جمهورباشقانی اولاراق تاماس سولیوکو سئچدی. ۵ مارس ۲۰۲۴ تاریخینده تاماس سولیوک ماجاریستانین ۷.جی جمهورباشقانی اولاراق آند ایچیب وظیفهسینه باشلادی. سولیوک ماجاریستان آنایاسا محکمهسی باشقانی وظیفهسینی یئریدیردی. اسکی ماجاریستان جمهورباشقانی کاتالین نوواک ۱۰ فوریه ۲۰۲۴ تاریخینده استعفا ائتمیشدی.
موغولستان جمهوریتی مجلیسی باشقانی زاندانشاتار گومبوژاو ۲۷ فوریه ۲۰۲۴ تاریخینده قیرقیز جمهوریتینه رسمی سفر گئرچکلشدیردی. بیشکئک شهرینده زاندانشاتار گومبوژاو قیرقیز قونومداشی نورلانبک شاکیئو، قیرقیزستان جمهورباشقانی سادیر جاپاروو و باشباخان آکیلبک جاپاروو ایله گؤروشمهلر ائتدی. موغولستان مجلیسی باشقانی گومبوژاو قیرقیز جمهوریتی مجلیسی باشقانی نورلانبک شاکیئوی اولانباتوردا تشکیل ائدیلهجک ترانس-آلتای سۆردورولهئبیلیرلیک دیالوگو فورومونا دعوت ائتدی. گؤروشمه سونوندا موغولستان مجلیسی و قیرقیز ژوگورکو کنهشی آراسیندا امکداشلیق آنلاشماسی ایمضالاندی. مجلیس باشقانی زاندانشاتار گومبوژاو قیرقیزستان جمهورباشقانی سادیر جاپاروو ایله گؤروشمهسینده موغولستان جمهورباشقانی اوخناگین خورلسوخون مکتوبونو سوندو. خاطیرلاتماق لازیمسا، قیرقیزیستان رئسپوبلیکا باشقانی سادیر جاپاروو گئچهن ایل موغولستانا رسمی سفر گئرچکلشدیرمیش و قیرقیزیستان اولانباتور ائلچلیگی ایشلرینه باشلامیشدی. باشباخان جاپاروو و مجلیس باشقانی گومبوژاو آراسیندا ائدیلهن گؤروشمه سونوندا ایکی اؤلکه آراسیندا ۵ آنلاشما ایمضالاندی.
۲۸ فوریه ۲۰۲۴ تاریخینده بیشکئکده قیرقیزیستان-تورکیه ایش فورومو گئرچکلشدیریلدی. قیرقیزیستان جمهورباشقانی سادیر جاپارووون حمایهسینده گئرچکلشدیریلن فوروما قیرقیزیستان باشباخانی آکیلبک جاپاروو، تۆرکیهدن ۶۰ نفرلیک ایش آداملاری هیئتی قاتیلدی. ایکی اؤلکه ایش آداملاری آراسیندا ائدیلهن گؤروشمهلر نتیجهسینده ۲.۷ میلیون دلارلیق آنلاشمالارین ایمضالاندیغی ایفاده ائدیلدی.
۱ مارس ۲۰۲۴ تاریخینده باکیدا جمهورباشقانی ایلهام علییئوین ایشتیراکی ایله یاشیل انرژی شوراسی ۲.جی باخانلار ییغینجاغی و گونئی طبیعی گاز کوریدورو شوراسی ۱۰.جو باخانلار ییغینجاغی گئرچکلشدیریلدی. ییغینجاغا آلبانی/آرناوودلوق باشباخانی ائدی راما، آوروپا بیرلیگی ایدارهچیلری و ایلگیلی اؤلکهلرین باخانلاری قاتیلدیلار. جمهورباشقانی ایلهام علییئو و آلبانی باشباخانی ائدی راما ایکیلی گؤروشمه گئرچکلشدیردی. آذربایجان و آلبانی آراسیندا ویزالارین قالدیریلدیغی آچیقلاندی.
***
۱-۳ مارس ۲۰۲۴ تاریخلرینده تۆرکیه جمهورباشقانی رجب طیب اردوغانین حمایهلرینده ۳.جو آنتالیا دیپلوماسی فورومو "بحرانلار دؤنمینده دیپلوماسینی اؤنه چیخارماق" باشلیغی آلتیندا باشارییلا گئرچکلشدیریلدی. فوروما ۱۰۰دن چوخ اؤلکهدن ۴ میندن چوخ نماینده قاتیلدی. فورومدا آوراسیا اؤلکهلرینین هامیسیندان نمایندهلر حاضر اولدو. قوزئی قیبریس تۆرک جمهوریتی جمهورباشقانی ارسین تاتار، ماجاریستان باشباخانی ویکتور اوربان، تۆرکمنیستان خالق مصلحتی مجلیسی باشقانی قوربانقولو بردیمحمدوو، آذربایجان، ارمنیستان، قازاقیستان، قیرقیزیستان، اؤزبکیستان، روسیا فدراسیونو خاریجی ایشلر باخانلاری فوروما قاتیلدیلار. فوروم چرچیوهسینده چوخ ساییدا ایکیلی گؤروشمهلر گئرچکلشدیریلدی. رجب طیب اردوغان-قوربانقولو بردیمحمدوو گؤروشمهسیندن سونرا ایکی اؤلکه آراسیندا ۳ آنلاشما ایمضالاندی.