تورکیهنین کؤنول کؤرپولری-02/2019
تیکا نه ایش گؤرور؟
تورکیهنین دوستلوق کؤرپولری بؤلومونده یونوس امره انستیتوسو، خاریجده کی تورکلر و اقربا توپلولوک لاری ایدارهسی، قیزیل آی جمعیتی و تیکا (تورک امکداشلیق و کووردیناسیون آژانسی) کیمی دونیا میقیاسیندا موختلیف اؤلکه و بؤلگهده دییشیک سوسیال-مدنیت لاییحهلرینی حیاتا کئچیرن تشکیلاتلاریمیزدان بحث ائدیریک. همین چرچیوهده ایلک حیسهده تیکا-نین تاریخینه دایر عمومی معلومات وئردیک. بو هفته و گلهجک هفته ایسه تیکا-نین فعالیتلریندن بحث ائدجییک.
وقف مدنیتینین بیر حالقاسی اولان تیکا دونیانین ان اوچقار یئرلرینه چاتدیردیغی یاردیملارلا تورکیه-نین اینسانی و ویجدانی موضعینی کونکرئت شکیلده اورتایا قویور.
اورتا آسیادان بالکانلارا، افریقادان لاتین امریکایا و گونئی آسیایا قدر گئنیش بیر جوغرافیادا اینکیشافا یؤنلدیلمیش ایقتیصادی، سوسیال، مدنیت ساحهلرینده موختلیف لاییحهلر حیاتا کئچیرهرک تورکیه-نین تجروبهسینی دوستلاری ایله بؤلوشور.
تیکا ایندی یه ده ک اؤلکه خاریجینده حیاتا کئچیریلن 25 مینه یاخین اینکیشاف لاییحهلریله خستهخانالار، مکتبلر، یوللار تیکهرک، یوز مینلرله مظلومون احتیاجینین اؤدنیلمهسینه ایمکان یاراتمیشدیر.
تورکیه-نین بو اؤلکهلرله اولان دوستلوق علاقهلرینین گوجلنمهسینه و موناسیبتلرین گوجلو سویهیه چاتماسینا دا تیکا تحفه وئریر.
حیاتا کئچیریلن لاییحهلرین موختلیفلیلیگی تحصیل، ساغلیق، منزیل، آنا-اوشاق ساغلاملیغی، تاریم و حیواندارلیق، نقلیات، اوره تیم، استخدام کیمی موختلیف ساحهلری احاته ائدیر. بوتون بو لاییحهلرین اساسیندا ایسه دوست اؤلکهلرین اؤز طبیعی ثروتلریندن تأثیرلی شکیلده ایستیفاده ائده بیلهجکلری قورومسال و بشری گوجه قوووشماسینا دستک اولماق و اوزون مودتده عدالتلی طرفداشلیغا اساسلانان امکداشلیغی اینکیشاف ائتدیرمک مقصدی دایانیر.
سون اوچ ایلده (2015-2017) بالکانلاردان اورتا آسیایا، اورتا دوغودان افریقایا قدر موختلیف جوغرافیادا 250-یه یاخین مشترک مدنیت و تاریخی میراث اولان اثرلر تیکا طرفیندن تمیر ائتدیریلهرک ایستیفادهیه وئریلدی.
سومالی، فیلیسطین، پاکیستان، قیرغیزیستان، مولدوی و هله بیر چوخ اؤلکهده تیکا طرفیندن تیکیلن خسته خانالاردا یوز مینلرله خسته موالیجه اولونور.