تورکیه-نین کؤنول کؤرپولری 2019/12
تورکیه بورس لاری
اؤتن هفته خاریجده یاشایان تورکلر و اقربا توپلولوقلاری ایدارهسینین ان اهمیتلی فعالیتلریندن بیری اولان "تورکیه بورس لاری" پروقرامینا دایر بعضی عمومی معلوماتلار وئرمیشدیک. بو بؤلومده سؤزوگئدن مؤضوعنو داوام ائتدیرجییک و "بورس پروقرامیندان ایستیفاده ائدهجک طلبهلر اوچون نئجه بیر پروسه نین ایشلدیگیندن و هانسی معیارلارا گؤره سئچیلدیکلرینه دایر معلومات وئرمهیه چالیشاجاغیق.
طلبه لرین سئچیلمهسی
طلبهلرین سئچیلمهسی پروسهسی "تورکیه بورس لاری" اوچون مراجعت ائدنلر؛ نامیزدین آکادمیک باشاریلاریندان، تدریس پلانیندان باشقا فعالیتلریندن و دیگر پئشکار تخصص لریندن آسیلی اولاراق قیمتلندیریلیر.
1 -ایلکین قیمتلندیرمه
بوتون مراجعتلر؛ مینیموم آکادمیک نوت، یاش حدی، لازیم اولان سندلر کیمی معیارلار چرچیوهسینده تدقیق ائدیلیر.
2 -سون سئچیم
اویغون قبول ائدیلن نامیزدلرین مراجعتلری؛ آکادمیک وضعیت، کئچمیش تخصص لر، آکادمیک ماراقلار، کاریئرا هدفلری، سئچیملرینین اویغونلوغو، نیت مکتوبونون مضمونو/ قاوراییشلی اولماسی و سوسیال فعالیتلرده ایشتیراکی کیمی بیر سیرا معیارلار چرچیوهسینده متخصص کومیته طرفیندن دقتلی شکیلده تدقیق ائدیلیر. بو مرحلهدن سونرا شیفاهی امتحان پروسه اوچون اویغون نامیزدلرین سون سیاهیسی حاضرلانیر.
3 -شیفاهی امتحان
100 -دن چوخ اؤلکهدن سئچیلهرک سون سیاهییا سالینان نامیزدلر آکادمیکلر و متخصص لردن عبارت شیفاهی امتحان کومیتهلری طرفیندن قیمتلندیریلیر.
4 -سئچیم
شیفاهی امتحان کومیتهلری طرفیندن نامیزد اولاراق معین ائدیلن مراجعت ائدنلرین امتحان نتیجه لری بیر سئچکی کومیتهسی طرفیندن قیمتلندیریلیر و بورس آلاجاق طلبهلرین سیاهیسی حاضرلانیر.
سئچیم معیارلاری
کافی خصوصیتلره مالیک اولان طلبهلر اؤلکهلرینده کئچیریلهجک شیفاهی امتحان لارا دعوت اولونور. بعضی حاللاردا مراجعت ائدنلرله اینترنت یاخود دا تلفون واسیطهسیله شیفاهی امتحان کئچیریلیر. امتحان کومیتهسی عمومی اولاراق ان آز بیر تورکیه بورس لاری نمایندهسی و تورکیه اونیورسیته لریندن اولان بیر آکادمیکدن تشکیل تاپیر.
عمومی لیکده 15-30 دقیقه داوام ائدن شیفاهی امتحان بو فورماتا گؤره کئچیریلیر:آ- قارشیلاما و گیریش ب-سندلرین یوخلانیشی ج-نامیزدین مراجعت مقصدینین اؤیرنیلمهسی د-آکادمیک معلومات و کاریئرا هدفلری ا- باغلانیش و نامیزد طرفیندن کومیتهیه سوال وئریلمهسی.