تورکیهده توریزم-۱۶
جومالیقیزیق
تورکیهنین مرمره بؤلگهسینده، اوریژینال تاریخی توخوسونو قوروموش، اوتانتیک(اصلینه اویغون) ائولری و کوچهلری ایله گؤزل بیر کند: جومالیقیزیق..."عثمانلی امپراتورلوغو دؤورونده آنادولودا کند حیاتی نئجه ایدی"؟ دئیه ماراقلانان گزگینلری آغیرلاییر.
جومالیقیزیق، ولایت سینیرلاری ایچینده اولدوغو بورسا ایله بیرلیکده ۲۰۱۴.جو ایلده یونسکونون دونیا میراث لیستهسینه آلیندی. بو بؤلگه، عثمانلی امپراتورلوغونون قورولوشونا شاهیدلیک ائتمهسی باخیمیندان اؤنملی.
"بورسا و جومالیقیزیق: عثمانلی امپراتورلوغونون دوغوشو" دونیا میراث ساحهسی، بورسا شهریندهکی ۶ وارلیغی احاطه ائدیر. بونلار؛ اورخانغازی کۆللیهسی و اطرافینی ایچینه آلان کروانسارالار بؤلگهسی، خداوندگار کۆللیهسی، ییلدیریم کۆللیهسی، یاشیل کۆللیه، مرادیه کۆللیهسی و جومالیقیزیق کندی...
عثمانلی امپراتورلوغونون ایلک باشکندی اولان بورسا، ۱۴.جو یوزایلین اولیندن اعتباراً سوسیال، مدنی و تیجاری باخیمدان گئتدیکجه گلیشمیش. عثمانلی دؤورونده شهرده اونلارلا مسجید، مدرسه، توربه، کروانسارا، حامام، عمارتخانا، شفاخانا، اؤرتولو بازار اینشا ائدیلمیش. بورسانین شهرلشمه مدلی، داها سونرا قورولان عثمانلی-تورک شهرلرینه نومونه اولوشدورموش.
بورسانین دونیا میراث لیستهسینه گبرمهسینی تامین ائدن زنگین تاریخی توخوسو، بیر آنادولو دؤولتیندن دونیا امپراتورلوغونا اوزانان پروسهنی گؤزلر آرنونه سرن ایزلر داشیییر.
عثمانلی امپراتورلوغونون تخمیناً ۷۰۰ ایللیک دؤورونده اینشا ائدیلهن یاپیلار، قوناقلارینی زامان ایچینده یولچولوغا چیخاریر.
بورسا شهر مرکزینه ۱۳ کیلومتر مسافهده، اولوداغ اتکلرینده یئر آلان جومالیقیزیق کندی، هم تاریخی توخوسو، هم ده گلهنکسل حیات طرزینی گونوموزه قدر قورویوب ساخلامیش. ایلک دؤور عثمانلی معمارلیق اوسلوبونو عکس ائتدیرهن اؤگون ائولری، یاغیشلی گونلرده سویون آخیب گئتمهسی اوچون اورتاسی کانال حالینا گتیریلمیش یاستی داش دؤشهمهلی کوچهلری و آنیدسال یاپیلاری ایله سانکی بیر آچیق هاوا موزهسی کرپیج ائولر، رنگ رنگ دووارلار، کوچه بولاقلاری ایله سیزی گونوموزدن آییراراق گئچمیشه داشیییر.
جومالیقیزیق هر ایل مینلرجه توریست قارشیلاسا دا، کندده اکینچیلیک پوزولمادان داوام ائدیر. کندلیلر اؤز محصوللارینی ساتیر کند میدانینداکی یئرلرینده...
بورسایا سفر ائدجک تعقیبچیلریمیزه تکلیفیمیز؛ مؤحتشم طبیعی گؤزللییه صاحب اولوداغی گؤرمهدن، شفالی سولاری ایله تانینان قابلیجالارا گئتمهدن، بورسا ایپگی آلمادان، مشهور یئرلی دادلاردان ایسکندر کابابی، کمال پاشا دادلیسی و شابالید شیرنیسی یئمهدن دؤنمهیین.