تورکییه‌ده توریزم-۱۷
اویقارلیقلارین ان گؤرکملی مدنیت و اینجه صنعت مرکزلرین‌دن بیری: برگاما
تورکییه‌نین باتی، اؤزللیکله اژه دنیزی ساحلینه یاخین بؤلگه‌لر، آرکئولوژیک باخیم‌دان اولدوقجا زنگین. برگاما چوخ قاتلی کولتورل لندشافت(منظره) آلانی، بو آرکئولوژیک بؤلگه‌لردن بیریدیر.
ایزمیره تخمیناً ۱۰۰ کیلونتر اوزاق‌لیق‌داکی ساحه، موختلیف دؤورلرده بیر چوخ مدنیتین داوام‌لی یاشادیغی، بشریتین اینکیشافینین اؤنملی مرحله‌لرینی گؤستره‌ن گؤرکملی بیر تاریخی شهر منظره‌سی اولوشدورور.
اویقارلیقلارین ان گؤرکملی مدنیت و اینجه صنعت مرکزلرین‌دن بیری اولان برگاما، ۲۰۱۴.جو ایلده یونسکونون دونیا میراثی لیسته‌سینه آلینمیش.
برگاما چوخ قاتمانلی کولتورل لندشافت ساحه‌سی، هئلئنیستیک، روما، دوغو روما و عثمانلی دؤورلرینه عاید قاتمانلاری ایچری‌سین‌ده ساخلاییر. بوتون بو فرق‌لی مدنیتلرین آرد آردا یئرلشمه‌سی، برگاماینا ائش‌سیز بیر شهرسل بیچیم و آنیدسال بیر معمارلیغین یانسیماسینی تامین ائتمیش.
بؤلگه؛ پئرگامون، کیبله مقدس ساحه، ایلیاس تپه، ییغما تپه، ایکی‌لی، دووشان تپه، ایکس تپه، آ تپه و مال تپه تومولوسلاری اولماقلا دوققوز بیله‌شن‌دن عبارت‌دیر.
آنتیک قایناقلاردا پرگامون اولاراق آدلان‌دیریلان شهر، میلاددان اؤنجه ۲۰۰لرده آتالوس خاندانلیغینین باشکندی اولموش؛ مدنی، علمی و سیاسی معنادا مرکز حالینا گلمیش‌دیر. معبد، سارای و تاتر کیمی یاپیلارین یانی سیرا بؤیوک بیر کیتابخانا قورولموش.
برگاما، میلاددان اؤنجه ۱۳۳.جی ایلده رومالیلارا گئچدیک‌دن سونرا، دؤورون ان اؤنملی ساغلیق مرکزلرین‌دن بیری اولاراق قبول ائدیله‌ن آسکلپیون قورولموش.
شهر اؤنمینی بیزانس دؤورون‌ده ایتیرمه‌یه باشلامیش. تیجارت یوللارینین دییشمه‌سی، برگامانین اورتا بؤیوکلوک‌ده بیر قصبه‌یه چئوریلمه‌سینه سبب اولدو.
آنتیک شهر، ۱۴.جو یوزایلین اولین‌ده عثمانلی امپراتورلوغونون یؤنتیمینه داخیل اولموش. بو دؤورده گئنیشلنمیش و یئنی بیر مدنی دییشیک‌لیک یاشامیش. عثمانلی مدنیتینی عکس ائتدیره‌ن حاماملار، کؤرپولر، کاروانسارالار، اؤتولو بازارلار و بازار یئرلری دوزلدیلمیش.
برگامانین ایلک قازینتی ایشلری ۱۸۷۰لی ایللرده باشلانمیش. بو گون آنتیک شهرین بؤیوک بؤلومو گون ایشیغینا چیخاریلمیش وضعیت‌ده. قازینتیلاردا اورتایا چیخان تاپینتیلارین بیر بؤلومو تورکییه‌نین ایلک آرکئولوژیک موزه‌سی اولان برگاما موزه‌سین‌ده سرگیلنیر.
کرال عائله‌سینین، یؤنتیجیلرین و قوموتانلارین یاشادیغی برگاما آکروپولو، اولاغان اوستو معمارلیق اؤزللیکلره صاحب. ان اؤنملی قورولوشو اولان آتئنا معبدینین بو گون بؤلگه‌ده تأسف کی، ساده‌جه تمللری قالمیش وضعیت‌ده. اصلی بئرلین‌ده پئرگامون موزه‌سین‌ده‌دیر. دیگر بیر اؤنملی قورولوش اولان زئوس سوناغی/قوربانگاهی دا یئنه بئرلین‌ده سرگیله‌نیر.
آگورا معبدی، دیونیسوس تاپیناغی و واختین‌دا ۲۰۰ مین کیتابین اولدوغو کیتابخانا، دیگر اؤنملی تیکی‌لیلر. کیتابلارین، رومالی قوموتانلاردان مارک آنتونیوس طرفین‌دن توی هدیه‌سی اولاراق مصر کرالیچه‌سی کلئوپاترایا هدیه ائدیلدیگی تخمین ائدیلیر.
آنتیک یونان و روما اویقورلیقلارین‌دا معبدلردن سونرا گلن ان اؤنملی یاپیلار تاترلار. برگاما تاتری، دیک بیر یاماجا اینشا ائدیلمیش و دونیادا بیلینن ان دیک اوتوروما صاحب تاتردیر. تخمیناً ۱۰ مین نفرلیک تاماشاچی توتومونا صاحب.
آشاغی شهر آدلانان بؤلوم‌ده، آگورا، هیکل اوخولو، ائولر و سئراپیس معبدی یئرلشیر. رومانین خریستیان اولماسی ایله کلیسه‌یه چئوریله‌ن معبد، اینجیل‌ده آدی گئچه‌ن یئددی کلیسه اوچون‌ده یئری معلوم اولان تک کلیسه.
دئمئتر تاپیناغی، ایدمان قارشیلاشمالاری اوچون اینشا ائدیلمیش اولان گیمناسیون، شهرین دیگر اؤنملی یاپیلاری.
آنتیک دؤورلرین بو گلیشمیش شهرینده، بیر ده ساغلیق مرکزی وار. ساغلیق و حکیم‌لیک تانری‌سی آسکلپیوس آدینا اینشا ائدیله‌ن آنتیک طب مرکزی آسکلپیون، عینی زامان‌دا دونیانین ایلک پسیکیاتری خسته‌خاناسی کیمی تانینیر. بورادا طب ساحه‌سین‌ده آراشدیرمالار آپاریلمیش و موختلیف معالیجه اصوللاری تطبیق ائدیلمیش.
آنادولونون بو اؤنملی آنتیک شهرینی گؤرمک اوچون برگامایا سفر ائد‌جک تعقیبچبلریمیزه تکلیفیمیز؛ شفالی مینرال بولاقلارین‌دان ایستیفاده ائتمه‌دن، یئرلی لذتلر تولوم پنیری و لوکما دادمادان گئری دؤنمه‌یین.
