تورکیه‌ده توریزم-۲۵
غازی‌آنتپ و اونون اطرافی ۱۰۶۷.جی ایلده تورکلرین اگمنلیینه گیره‌رک، آنادولو سلجوق‌لو دؤولتینین ترکیبین‌ده یئر آلمیش
غازی‌آنتپ تورکییه‌نین گونئی دوغو آنادولو بؤلگه‌سین‌ده یئر آلان بیر شهر تاریخ و مدنیت ماراقلیلارینین دقتینی چکه‌جک بیر چوخ اثر صاحبی.
غازی‌آنتپ، تاریخ بویو آنادولودا قورولان بوتون دؤولتلر اوچون اؤنملی بیر مرکز اولموش. روما امپراتورلوغو زامانین‌دا بیر سرحد شهری. ۳۹۵.جی ایلده امپراتورلوق بؤلونه‌ن‌ده دوغو روما ایچین‌ده قالمیش. ایسلامین یاییلماغا باشلاماسین‌دان سونرا عباسیلرین الینه کئچمیش.
غازی‌آنتپ و اونون اطرافی ۱۰۶۷.جی ایلده تورکلرین اگمنلیینه گیره‌رک، آنادولو سلجوق‌لو دؤولتینین ترکیبین‌ده یئر آلمیش. ۱۳.جو یوزایلین اورتالارین‌دا موغوللارین ایستیلاسینا اوغرامیش. ایستیلادان مملوک دؤولتی طرفین‌دن قورتاریلمیش. بؤلگه‌ده ثابت‌لیک عثمانلی یؤنتیمینین گلمه‌سی ایله تامین ائدیله‌بیلمیش. بیرینجی دونیا ساواشین‌دان سونرا ایشغالا معروض قالسا دا وئریله‌ن بؤیوک مباریزه‌نین آردین‌دان یئنی‌دن تورک تورپاقلارینا قاتیلمیش.
غازی‌آنتپ، فرق‌لی مدنیتلرین و کولتولرین بیر یئره گله‌رک بیر بیریلری ایچین‌ده سینتزلندیگی بیر تاریخه صاحب. ایلک چاغلاردان بری بؤلگه‌ده یاشایان توپلوملارین ایزلرینی و اثرلرینی بؤلگه‌ده گؤرمک مومکون. تاریخی ایپک یولونون اوزرین‌ده یئرلشدییندن اویقارلیقلارین اوغراق یئری اولموش؛ هر دؤور مدنیت و تیجارت مرکزی اولما اؤزللیگینی قورویوب ساخلامیش. غازی‌آنتپ‌ده یئرلشه‌ن تاریخی اثرلرین چئشیدلی‌لیگی، شهرین مد‌نی زنگینلیینین گؤستریجی‌سی.
غازی‌آنتپ‌ده گؤروله‌جک یئرلرین باشین‌دا قالالار گلیر. تیکینتی‌سی ۲.جی عصره قدر اوزانان غازی‌آنتپ قالاسی، آنادولوداکی ان مؤحتشم قالالاردان بیری. ولایت اراضی‌سین‌ده آرابان قالاسی، روم‌قالا، تیلباشار قالاسی کیمی اینشاسی یوزلرجه ایل اؤنجه‌یه دایانان قالالار مؤوجوددور.
غازی‌آنتپین آرابان ائلچه‌سی سرحدلری ایچری‌سین‌ده، آنادولو آنید مزار معماریسی اوچون اؤزگون اولان اوچ روما دؤورونه عایید مزار آنیدی یئر آلیر.
عثمانلی دؤورون‌ده، شهرده یاشایان مسلمان اولمایان وطنداشلارا خیدمت گؤستره‌ن کلیسه‌لر، هم فونکسیونلارینا باغلی اولاراق حیاتا گئچیردیکلری توپلاییجی تأثیر، هم ده مؤقعیتلری سببین ایله شهرین کاراکترینی معینلشدیرمک‌ده اؤنملی وظیفه آلیمیشلار. کندیرلی کلیسه‌سی، عزیز بدروس کلیسه‌سی، نیزیپ فوقانی کلیسه‌سی شهرده‌کی کلیسه‌لردن بیر نئچه‌سی.
۱۲۰۰لو ایللرین اولین‌ده اینشا ائدیله‌ن علی ناجار مسجدی، عمریه مسجیدی، ۱۶.جی یوزایل‌ده اینشا ائدیله‌ن شیخ فتح‌الله مسجدی و مجتمعی، ایوب‌اوغلو مسجدی، آلای‌بی مسجدی، ۱۷.جی یوزایله عاید شیروانی مسجدی، قورتولوش مسجدی، شهرده‌کی اؤنملی مسجدلر.
غازی‌آنتپ‌ده، سلجوق‌لو و عثمانلی معماریسینده اؤنملی بیر یئری اولان بیر چوخ خان(کروانسرا) وار. هیشوا خان، آنادولو خان، بایاز خان، بودئیری خان، بوغدا خانی، گؤمروک خانی، شکر خانی، دوز خانی، توتون خانی، یوزلرجه ایل، تیجارت آماجلی کروانلارین، یولچولارین گئجه راحت و گووه‌ن ایچین‌ده گئچیرمه‌لرینی تامین ائتمیش. عینی زامان‌دا اوزاق دیارلاردان گلن ماللارین ال دییشدیردیگی بیر تیجارت مرکزی اولاراق خیدمت وئرمیش.
غازی‌آنتپ‌ده، عثمانلی معمارلیغینین اؤنملی یاپیلاریندان اولان حاماملارین بیر قیسمی هله ده ایستیفاده ائدیلیر.
غازی‌آنتپ‌ده گؤروله‌جک ان اؤنملی یئرلردن بیری زئوگما آنتیک شهری. شهر، نیزیپ ائلچه‌سینه ۱۰ کیلومتر مسافه‌ده. بؤیوک اسکندرین ژنراللارین‌دان ۱.-جی سلوکوس نیکاتور طرفین‌دن میلاددان اؤنجه ۳۰۰ده قورولان شهر، اینجه صنعت ساحه‌سین‌ده دؤورونون چوخ ایرلی‌سینده‌ایدی. تیکی‌لیلری بزه‌یه‌ن مؤحتشم موزائیک دؤشه‌مه‌لر دونیاداکی نومونه‌لرینی گئری‌ده بوراخاجاق اؤزللیکده ایدی. بؤلگه‌نین یالنیز بیر بؤلومونده آپاریلان قازینتیلاردا گون ایشیغینا چیخاریلان موزائیکلر، زئوگمانین تام بیر موزائیک شهری اولدوغونو گؤستریر.
زئوگما آنتیک شهرین‌دن چیخاریلان اثرلر بو گون، دونیانین ان اؤنملی موزه‌لری آراسین‌دا گؤستریله‌ن غازی‌آنتپ موزائیک موزه‌سین‌ده سرگیلنیر. مشهور "قاراچی قیزی" موزائیکی یئنه بورادا سرگیله‌نیر.
غازی‌آنتپ، بوتون بو اؤزللیکلری ایله هر ایل یوز مینلرجه یئرلی و خاریجی توریستی آغیرلاییر. شهره گئتسه‌نیز، اوناریمی ائدیلن تاریخی آنتپ ائولرینی گزمه‌نیزی، گوموشچولوک، پاخیرچیلیق، صدفچیلیک، یمئیجیلیک کیمی یؤره‌یه اؤزگو ال صنعتلری اۆرونلرین‌دن آلمانیزی، یؤره‌سل بیر قهوه اولان مننگیچ قهوه‌سینی دادماغی تکلیف ائدیریک.
