تورکیه‌ده توریزم- ۲۶
چاناق‌قالا، تورکییه‌نین گئچیلمز قالاسی
چاناق‌قالا، تورکییه‌نین قوزئی باتیسیندا آوروپا و آسیا قاره‌لرینی بیر بیرین‌دن آییران بوغازین ایکی یاخاسین‌دا قورولموش بیر شهر... آنادولو ایله تراکیانین بیرلشمه یئرین‌ده یئرلشیر. مؤوقعیتی سببی ایله اولدوقجا زنگین بیر تاریخه صاحب.
چاناق‌قالانین میلاددان اؤنجه ۳۰۰۰.جی ایلده‌ن بری یاشاییش یئری اولدوغو بیلینیر.
چاناق‌قالا بوغازی، آنادولو ایله آوروپا و آغ‌دنیز ایله قارا دنیز آراسینداکی باغلانتی‌نی تامین ائدن ایکی گئچید بؤلگه‌سیندن بیری...بو وضعیت، تاریخ بویو مختلیف کؤچ و ایستیلا حرکتلرینین هدفی اولماسینا یول آچمیش.
دییشیک تاریخلرده یئرلشمک یا دا تالاماق مقصدیله بؤلگه‌یه گلنلر اولموش؛ هر ایکی وضعیت ده مدنیت آلیش وئریشینی آرتیرمیش. بو مد‌نی یوغرولما، عصرلر بویو آرالیقلارلا داوام ائتمیش؛ نتیجه‌ده اولدوقجا رنگ‌لی بیر مدنیت موزائیکی اورتایا چیخمیش.
بوغازین ان دار یئرین‌ده فاتح سلطان محمد دؤورون‌ده آوروپا یاخاسین‌دا کیلیدبحیر، آنادولو یاخاسین‌دا سلطانیه، یا دا ساخسی قالاسی آدی ایله آنیلان قالالار تیکیلمیش. ائلین آدی، آنادولو یاخاسین‌داکی چاناق قالاسین‌دان گلمک‌ده...
میلاددان اؤنجه ۱۲۰۰لره قدر ترویا خالقی یاشامیش بؤلگه‌ده. ترویا ساواشلاری ایله آکالار، ائگه کؤچلری ایله چئشیدلی قوملار گلمیش. سونرا، آنادولودا یازی‌لی تاریخ آچیسیندان قارانلیق دؤور باشلامیش. سونرا، سیرا ایله لیدیا کراللیغینین، پرسلرین، مقدونیه کراللیغینین، روما و بیزانس امپراتورلوغونون حاکمیتی آلتینا گیرمیش. بؤلگه‌ده عثمانلی دؤولتینین گوجله‌نمه‌سیله یاناشی تورک تورپاقلارینا قاتیلمیش.
چاناق‌قالا آدی تاریخین ان بؤیوک ساواشلارین‌دن بیری ایله آنیلیر عینی زامان‌دا.
بیرینجی دونیا ساواشی ایللرین‌ده، چاناق‌قالا بوغازینی گئچمک، ایستانبولو اله گئچیرمک و قارا دنیزه چیخماق ایسته‌یه‌ن اینگیلیس و فرانسیزلار، بوغازی قوشاتدی. تورک اوردوسو، بیر اؤلوم-قالیم مبارزه‌سی حالینا گلن بو ساواش‌دا، بؤلگه‌نی قاریش قاریش مدافعه ائد‌رک بوغازدان گئچید وئرمه‌دی. قورودان و دنیزدن ائدیله‌ن سالدیریلار اوغورلا پوسکورتولدو و تورک اوردوسو تاریخه گئچه‌جک بیر غلبه قازاندی.
ولایت سینیرلاری ایچینده یئر آلان، بیرینجی دونیا ساواشینین ان قانلی چاتیشمالارینین باش وئردیگی گئلی‌بولو یاریم آداسی میللی پارکی، سانکی بیر ساواش موزه‌سی گؤرونومونده. وطنلرینین تورپاقلارینی قهر‌مانجا مدافعه ائدن تورک اوردوسونون اون مینلرجه شهیدی اوچون دوزلدیلمیش آنیدلار، شهیدلیکلر مؤوجود.
آیریجا ایشغال گوج‌لری یعنی اینگیلیس، فرانسیز، استرالیا و یئنی زلاند عسگرلری اوچون تیکیلمیش آنیدلار دا وار.
چاناق‌قالا ساواشینین ایزلرینین شاهیدی اولماق ایستییرسینیزسه؛ آنزاک کؤفزی، کیلیدبحیر قالاسی، نامازگاه تابیاسی(استحکامی)، جونک‌باییری، یالنیز چام آنیدی، 57.جی پیاده آلایی شهیدلیگی، سدالبحر قالاسی، شهیدلر آنیدی زیارت ائده‌بیله‌جگینیز یئرلر. ساواشین داغیدیجی‌لیغی و آجیلاری، گئلی‌بولو یاریم آداسینین تامامیندا گؤروله‌بیلیر.
آنزاک عسگرلرینین چیخدیغی و آغیر ایتکیلر وئردیگی آنزاک کؤرفزینده هر ایل ۲۵ آوریل گونو آنما مراسیملری گئچیریلیر. بیر بیرینه قارشی ووروشان طرفلرین نوه‌لری، آنما تدبیرلرین‌ده عینی دویغولارلا، بیرلیکده ایشتیراک ائدیر؛ عینی کدری پایلاشیر.
بو اؤزل تاریخی گئچمیشین‌دن دولایی گئلی‌بولو یاریم آداسی میللی پارکی، دونیادا ان چوخ گزیلن میللی پارکلار آراسیندا یئر آلیر.
چاناق‌قالایا گئتسه‌نیز، گئلی‌بولو یاریم آداسین‌داکی شهیدلیکلرله یاناشی، یونسکونون دونیا میراث لیسته‌سینده یئر آلان ترویا آرکئولوژیک ساحه‌سینی گؤمه‌نیزی تکلیف ائدیریک.
آسوس‌داکی آتئنا تاپیناغی، تاریخده ایلک گؤزللیک یاریشماسینین گئچیریلدیگی قازداغلاری، گؤکچه آدا و بوزجا آدا، گؤرمه‌لی دیگر یئرلر آراسین‌دادیر.
